ବସ୍ତାରୁ ୨ଟି ମଣିଷ ଖପୁରି ଉଦ୍ଧାର ହୋଇଛି । ଏହି ଦୁଇଟି ଖପୁରି କୌଣସି ମହିଳାଙ୍କର ହୋଇଥିବା ସନ୍ଦେହ କରାଯାଉଛି । ଭଦ୍ରକ ଜିଲ୍ଲାର ବାସୁଦେବପୁର ବ୍ଲକର ବାଲିମୁଣ୍ଡା ପଞ୍ଚାୟତର ବଡହାବେଳି ସାହି ପାଞ୍ଚଘେରିଆ ଲୁଣାବନ୍ଧରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ସେପ୍ଟେମ୍ବର ୨୭ ତାରିଖରେ ବଡହାବେଳି ସାହିର ମାଆ ଓ ଝିଅ ସୁଭଦ୍ରା ଯୋଜନାର ଫର୍ମ ପକାଇବାକୁ ଯାଇ ଘରକୁ ଫେରିନଥିଲେ । ମା ଏବଂ ଝିଅ ଘରକୁ ନଫେରିବାରୁ ତାଙ୍କ ପରିବାରଲୋକେ ନାୟକାଣୀଡିହି ଥାନାରେ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା । ତେବେ ବୁଧବାର ରାତିରେ ଲୁଣାବନ୍ଧରେ ଏକ ବସ୍ତାରୁ ଦୁର୍ଗନ୍ଧ ଆସୁଥିବାର ଦେଖିଥିଲେ ସ୍ଥାନୀୟଲୋକେ । ସନ୍ଦେହ ହେବାରୁ ଉକ୍ତ ବସ୍ତା ପଖକୁ ଯାଇ ଦେଖିଥିଲେ । ବସ୍ତା ମଧ୍ୟରେ ୨ଟି ଖପୁରି ରହିଥିବାର ଦେଖିଥିଲେ ଲୋକେ । ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ନାୟକାଣୀଡିହି ପୋଲିସ ପହଞ୍ଚି ଖପୁରି ଦ୍ୱୟକୁ ଜବତ କରିଛି । ଆସନ୍ତା କାଲିଠାରୁ ଏହି ଘଟଣାର ତଦନ୍ତ ଆରମ୍ଭ ହେବ । ତେବେ ଉକ୍ତ ଖପୁରି କାହାର ସ୍ପଷ୍ଟ ହୋଇନଥିବା ବେଳେ ଏହି ମାଆ ଓ ଝିଅଙ୍କର ଖୁପୁରି ହୋଇଥିବାର ଲୋକେ ସନ୍ଦେହ କରୁଛନ୍ତି ।
