ଓଡ଼ିଶାରେ ଶୁଭାରମ୍ଭ ହେବ ଆୟୁଷ୍ମାନ ଭାରତ ଯୋଜନା। ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନ୍ସିଂ ଜରିଆରେ ଏହାର ଶୁଭାରମ୍ଭ କରିବେ। ରାଜ୍ୟରେ ଆୟୁଷ୍ମାନ ଭାରତର ଉଭୟ ପାର୍ଟ ୧ ଓ ୨ ଲାଗୁ ହେବ ।
ମଙ୍ଗଳବାର ପ୍ରଧାନମନ୍ତ୍ରୀ ଜଟଣୀ ନିକଟରେ କେନ୍ଦ୍ରୀୟ ଯୋଗ ଓ ନେଚରପାଥି ଗବେଷଣା ପ୍ରତିଷ୍ଠାନର ଶିଳାନ୍ୟାସ କରିବେ । ଏହାଛଡ଼ା ବରଗଡ଼ରେ ପ୍ରଧାନମନ୍ତ୍ରୀ ଆୟୁଷ୍ମାନ ଭାରତ ସ୍ୱାସ୍ଥ୍ୟ ଭିତ୍ତିଭୂମି ମିଶନରେ ଜଟିଳ ରୋଗ କେନ୍ଦ୍ରର ଉଦଘାଟନ କରିବେ ପ୍ରଧାନମନ୍ତ୍ରୀ । ସ୍ଥାନୀୟ ଗୋଠପାଟଣାରେ କେନ୍ଦ୍ରୀୟ ଡ୍ରଗସ୍ ପରୀକ୍ଷା ଗବେଷଣାଗାରର ମଧ୍ୟ ଉଦ୍ଘାଟନ କରିବେ ପ୍ରଧାନମନ୍ତ୍ରୀ ।
ସ୍ୱାସ୍ଥ୍ୟମନ୍ତ୍ରୀ ଡ. ମୁକେଶ ମହାଲିଙ୍ଗ କହିଛନ୍ତି, ରାଜ୍ୟରେ ଚଳିତ ବର୍ଷ ଶେଷ ସୁଦ୍ଧା ଆୟୁଷ୍ମାନ ଭାରତ ଲାଗୁ ହେବ । ତା’ ସହ ଗୋପବନ୍ଧୁ ଜନ ଆରୋଗ୍ୟ ଯୋଜନା ସମାନ୍ତରାଳ ଭାବେ ମଧ୍ୟ ଚାଲୁ ରହିବ । ଉଭୟ ଯୋଜନା ପାଇଁ ହିତାଧିକାରୀଙ୍କ ପରିବାରକୁ ଗୋଟିଏ କାର୍ଡ ମିଳିବ । ଏହି କାର୍ଡ ଜରିଆରେ ପରିବାର ସଦସ୍ୟଙ୍କୁ ଚିକିତ୍ସା ସେବା ମିଳିବ । ପ୍ରଥମ ପର୍ଯ୍ୟାୟରେ ରାଜ୍ୟର ୧ କୋଟି ପରିବାରକୁ ଉଭୟ ଆୟୁଷ୍ମାନ ଓ ଗୋପବନ୍ଧୁ ଜନ ଆରୋଗ୍ୟ ଯୋଜନାରେ ସାମିଲ କରାଯିବ । ସେଥିରୁ ୬୭ ଲକ୍ଷ ପରିବାରକୁ ଆୟୁଷ୍ମାନରେ ସାମିଲ କରାଯିବ । ୩୩ ଲକ୍ଷ ପରିବାର ଗୋପବନ୍ଧୁ ଜନ ଆରୋଗ୍ୟ ଯୋଜନାରେ ସାମିଲ ହେବେ ।
ଆୟୁଷ୍ମାନ ଭାରତ ସହ ଗୋପବନ୍ଧୁ ଜନ ଆରୋଗ୍ୟ ଯୋଜନା ମାଧ୍ୟମରେ ରାଜ୍ୟର ୧ କୋଟି ପରିବାରର ୩ କୋଟି ୫୦ ଲକ୍ଷ ଲୋକ ମାଗଣା ଚିକିତ୍ସା ସେବା ପାଇବେ । କାର୍ଡଧାରୀମାନେ କେନ୍ଦ୍ର ସରକାରଙ୍କ ସହ ଅନୁବନ୍ଧିତ ଦେଶର ୨୭ହଜାର ହସ୍ପିଟାଲରୁ କ୍ୟାସଲେସ୍ ଚିକିତ୍ସା ସେବା ପାଇବେ ।
ଆୟୁଷ୍ମାନ ଲାଗୁ ହେବାପରେ ମଧ୍ୟ ମହିଳାମାନଙ୍କୁ ୧୦ଲକ୍ଷ ଟଙ୍କାର ମାଗଣା ଚିକିତ୍ସା ସେବା ମିଳିବ । ଆୟୁଷ୍ମାନ ଭାରତ ପାର୍ଟ-୨ରେ ରାଜ୍ୟର ୭୦ ବର୍ଷରୁ ଊଦ୍ଧ୍ୱର୍ ବୟସ୍କମାନେ ଲାଭାନ୍ୱିତ ହେବେ । ଧନୀ, ଗରିବ, ପେନସନଧାରୀ ୭୦ ବର୍ଷରୁ ଉଧ୍ୱର୍ ଯେ କୌଣସି ବୃଦ୍ଧବୃଦ୍ଧା ଏଥିରେ ସାମିଲ ହୋଇପାରିବେ । ବାର୍ଷିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱାସ୍ଥ୍ୟ ବୀମାରେ ସେମାନେ ଉପକୃତ ହେବେ । ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟ ସରକାର ଜନସାଧାରଣଙ୍କୁ ନୂଆ କାର୍ଡ ବଣ୍ଟନ କରିବାକୁ ସଂକଳ୍ପବଦ୍ଧ ବୋଲି ମନ୍ତ୍ରୀ ଡ. ମହାଲିଙ୍ଗ ସୂଚନା ଦେଇଛନ୍ତି ।
